زوار المدونة

الجمعة، 28 فبراير 2014

مفضلاتي لشهر فبراير /february favorites 2014


السلام عليكم ورحمة الله وبركاته

بما ان اليوم اول يوم من مارس ف اكيد هل تدوينه راح تكون

عن مفضلاتي للشهر اللي راح اذا كنتو تتابعوني من فتره ف باخر مفضلات شهريه قلت مفضلاتي الجايه راح تكون

غير وبعدها انقطعت لفتره ..المهم

حبيت اقسم هل مفضلات لكذا تقسيمه والسبب

ان بالشهر في اشياء كثيره نسويها وتعجبنا غير عن المنتجات التجميليه فحلو اشاركها

معاكم واتمنى تعجبكم الفكره

 









بالنسبه للتقسيمه راح اشرحها بكل اسم

منتجات : من اسمها واضح المنتجات اللي استخدمتها بكثره وحبيتها

حساب : عباره عن اكاونت اعجبني بالانستقرام فادني واحس انه راح يفيدكم لو ذكرته

هدف: عباره عن هدف حابه اسويه من بدايه هل شهر وبالمفضلات الجايه راح اقولكم ان شاء الله اذا حققت هل هدف وايش الهدف للشهر الجاي

تطبيق: بذكر لكم بكل مفضلات ان شاء الله تطبيق حلو واستفدت منها

تدوينه: بشاركم برابط تدوينه قريتها وحسيت انها اعجبتني كثير وراح تفيدكم ان شاء الله

ما أعجبني : بذكر اسم منتج ما اعجبني

*ملاحظه الترتيب هاذا ماراح يكون ثابت على حسب كل شهر ايش احس شي كان فيه فممكن ابدل يعني ممكن بعدين اذكر لكم كتاب وهكذا

 

بالنسبه للي مهتمين بالمنتجات اكثر تقدرون تقرون البدايه بس لان اول شي راح اتكلم عنه المنتجات

وبس بسم الله نبداء

 









هاذي المنتجات اللي استخدمتها ترا موبس استخدمتها لشهر فبراير

صارلي استخدمتها لفتره طويله وعلى فكره بالمفضلات اختي تشاركني بعد

يعني اسألها واصور المنتجات ككل والسبب في هل شي اني اثق برائيها

وهي نفسي غالباً مع المنتجات ودايم تعجبنا نفس الاشياء ..

 

راح اتكلم بالبدايه عن هل منتج


 
butter london cuticle oil

قبل لا اتكلم عن المنتج شرايكم بالصوره أقتراح اختي

ترا معجبه فيها ( فيس مفتخر ) ,,,<< لا تسألوني كيف شكله

نرجع للمنتج احبه كثييير وتكلمت عنه بالانستقرام هو عباره عن

مجموعه زيوت وفيتامينات

للمنطقه اللي حول الظفر

مكتوب على المنتج ان تستخدمينه عند الحاجه

وتقدرين تستخديمنه قبل النوم كـ روتين مثلاً

اللي اعجبني فيه ..



1/ ان ريحته تفتح النفس عاده ماتعجبني ريحه الزيت بس

هاذا في رائحه عطريه جميله فتحببك في انك تستخدمينه

2/ كميته كبييييره جداً لي ثلاث شهور استخدمه وشوفو الصوره مانقص شي نقطه وحده تكفي اصابع يدك كلها

3/ ان تاريخ صلاحيته طويل تقريباً سنتين ونص من وقت الفتح يعني تستفيدين منه لفتره طويله ..

سعره : ما اتذكر من فتره شاريته بس

بالموقع تقريباً 71 ريال



هل راح ارجع اشتريه .. اكيييييد





 



نجي للي بعده جمااااال

بختصار شديد اللي بالصوره عباره عن مشط

من الصيف وانا استخدمه ومره ضاع وتأزمت ليه

لانه حل سهل وسريع للتشابك

بختصار المشط مثل ما انتو شايفين له اكثر من راس وهل شي يساعد على سهوله فك تشابك الشعر

الفرق عن المشط العادي

لو كنتي مثلا تقعدين دقيقتين تمشطين شعرك هاذا راح يخليها دقيقه ان شاء الله

ما ادري وين ينباع بس في مدونه قالت انه لقته في صيدليه وايتس

عموماً اذا تعرفون وين ينباع قولو لي على التويتر عشان اعدل التدوينه واكتب المكان بالانستقرام بعد

هل انصح فيه ..أكيييييييييييييييد











هل روج من ريميل تكلمت عنه في تدوينة الارواج المناسبه للدوام ..جمييل وهادي وصايره استخدمه كثيير بالجامعه انصحكم فيه .. 

رقمه:8
أعتذر لان اللون مش واضح بس هنا صوره من النت اوضح

 





 

 









هاذا مناكير احمر عادي يعني درجته مش مميزه

طيب ليه حطيتيه ..؟!

لانه يجننننن بختصار هاذا المناكير من

ماركه mua

ماعرفتها الصراحه الا من مدونه اسمها

ترنيم/أمل

الله يجزها خير تكلمت عن كذا منتج وشريته من عندهم وأعجبوني

نرجع للمناكير بختصار شديد ماشريته شرتها اختي وانا اقولها في المحل من جدك بتشترينها اكيد سيئه

هي سعرها 1 باوند يعني تقريباً 6 ريال

طبعاً انا قلت لها كذا على اساس ان كل شي رخيص سيىء

المهم ان لي شهرين وانا سارقه هل مناكير منها ولا رجعتها وان شاء الله بس ما تشوف هل تدوينه ههههههه

مارجعتها لانها تنشف بسرعه مايمديني اخلص يد الا هي ناشفه ..بس تحتاج طبقتين انا ما اشوفه عيب لاني سايره بكل المناكير احط طبقتين خفاف فمايفرق معي

احط هل مناكير دايم اذا ماعندي وقت وابي شي ينشف بسرعه

مميزات هل مناكير :

سعرها رخيص .6 ريال

تنشف بسرعه

الوانها حلوه

تستحق الشراء بقوه

 

 

 

 
 









 



مسكرة الحواجب من ماك ومين مايعرفها

اتوقع اغلب اللي جربها حبها

لها ميزتين

اذا حواجبك مش مرسومه بتعجبك ...

ليه ؟!.. لانك لما ترسمين حواجبك بالشادو وتخلينها اخر خطوه بدال المسكره الشفافه فبتساعد انها ترتب لك حاجبك وتخلي رسمتك لحاجبك تدووم لفتره طوييله

اهم شي مشطيها بعد المسكارا بمشط الحواجب عشان تطلع طبيعيه اكثر

واذا حواجبك مرسومه وكثيفه ماشاء الله بس سودا وودك تفتحينها اشتري اللون البني منها انتبهي لا تشترين الاشققر البني زين

حطيها على حواجبك وراح تفتحها ان شاء الله ..

صديقتي من استخدمتها وهي مستغنيه عن صبغ الحواجب

هي حواجبها سودا وشعرها بني فاتح وماخذه نفس هل درجه ومرتاحه عليها

هل راح ارجع اشتريهاا اكيييد وانصحكم فيها



 

 
 



نجي للي بعده مزيل المناكير

هاذا الله يسلمكم في وحده باليوتيوب اجنبيه تكلمت عنه وبأنبهار شديد وتقول انها من استخدمته واظافرها متحسنه طبعاً انا اطالعها اقول من جدها تتكلم هل مزيل ما استخدمه الا اذا خلصت كل منتجات ازاله المناكير وما باقي الا هو بالبيت اتأزم اذا استخدمته

المهم ان اظافري من كم شهر تكسرت وكنت استخدمه لما ازيل المناكير وانا معصبه مش عاجبني هل منتج ههههههه بس لاحظت

ان اظافري متغيره طالت وصايره صحيه

عاد تذكرت اني استخدمه

ومن عقبها حبيته

مميزاته:

يقوي الاظافر

في ماده زيتيه فما ينشف الاظافر

بعكس الاستون طبعاً الماده لفتره قصيره ولا تغني عن زيت الاظافر

الحلو فيه انه 2 في واحد زي المنديل وفيه الماده

فيختصر عليك القطن والاستون

غير كذا له كذا ريحه عطريه اذا انتي من النوع اللي تزعجك ريحه مزيلات المناكير

له يمكن 10 انوع

غير كذا سعره بلاش

مرات الاقيه 3 ريال

مرات 5ريال

المهم انه مايتعدى عشره

تلاقونه بالصيدليات

 

عيوبه:

يطول ببعض انواع المناكير لما تشيلينه يعني يقعد من 5الى 10 دقايق ..ومرات 3 دقايق الا انتي خالصه على حسب النوع يعني

اذا خليتي العلبه مفتوحه ينشف فتأكدي انك تسكرينها عدل




 
 


 

 


 

 


 

هل منتج تكلمت عنه بمشترياتي من لاش

هو تونر جمييل وخفييف انا عاده ما التزم بالتونر يومياً بس معاه التزمت كثيير

ليه ..!

لانه بخاخ فما عليك الا انك تبخينه وتستمتعين بالانتعاش وتمسحينه بقطنه

انا خذيت الحجم الكبير وقعد عندي فتررره طويييله 3 شهور وكثر وانا ابخ اكثر من مره باليوم ولا قرب يخلص الا تو ..

انصحكم فيه سعره شوي مرتفع

بس على الفتره اللي يقعد فيها يستاهل


 

 



Dior lip glow

يشبه فكره الحمره السحرية بس على انعم وأحلى بكثير بالنسبه لي الحلو فيه  انه يعطي لون مورد طبيعي لشفايف ويختلف اللون من شخص لآخر وفيه واقي شمس
ومرطب ممتاز والروج بعده يطلع بشكل جميل


عيوبه

السعر مرتفع شوي مقارنه بمرطبات الشفايف الثانية

 سعره :
120 ريال تقريباً

هل راح اشتريه مره ثانيه ؟

ثانيه وثالثه





وبكذا خلصت المنتجات نجي للبارت اللي بعده
 
 

@mriom_makeup

حسلب كويتيه بالانستقرام تعرض تجاربها وتعرض لوكات مكياج احياناً

استفدت منها انصحكم تتابعوها


 
 
 
 
 
 
 

real bokeh

 
التطبيق موجود بالايفون والاندرويد
هو تطبيق لتعديل الصور يتيح لك انك تضيفين اي بوكيه واي شكل
بالالوان اللي تبغينها انصح فيه هو التطبيق اللي اعدل عليه صوري بالانستقرام




 


هل تدوينه اعجبتني كثيير هي للاخت هيا البلوي
تتكلم عن مجموعه الفرش اللي عندها من ماك
وكيفيه استخدامها واسعارها
بتفيدك اذا كنتي مفكره تشترين من ماك فرش
عموما الاخت هيا مدونه رائعه ماشاء الله
انصحكم تشوفون تدويناتها
 
*على فكره هل تدوينه لها سنه بس توني اشوفها
 
 





هاذا شاي لاتيه من ليبتون
شكل العبوه حلو بس المحتوى سيىء
ماراح ارجع اشتريه
الشي الحلو فيه شكل المغلف بس
 
 
 
 




هدفي لشهر مارس
اني التزم التزام تام بشرب 7 كاسات من الماء
وان شاء الله بمفضلاتي الجايه اكتب لكم اني استمريت بالهدف
اللي حابه تشاركني بهل هدف تكتب لي بالتويتر بيسعدني هل شي

 

 
 
وبس بكذا اكون خلصت ان شاء الله تعجبكم
اي انتقادات اي شي اتقبل بكل صدر رحب
هاذا اسمي بالتويتر والانستقرام

Glamour_90s

اسعد بتواصلكم



 
لا الله الا انت سبحانك اني كنت من الظالمين

 

هناك 3 تعليقات:

  1. ماشاءلله حبيت فكرة المفضلات بشكل كبير، جد جبتيها بطريقة مختلفة!
    وحطيت في بالي كم شي بشتريه من المفضلات + نزلت الآب للايفون على طول :p

    ردحذف
    الردود
    1. مشكووره حبيبتي كلامك جداً محفز .. و الحمد لله انها اعجبتك

      حذف
  2. شكراً عزيزتي قلامور لذكري و اعجابك بالتدونية ..
    اقّدر لك ذلك ..
    وفكرة الموضوع جميلة جداً .. بالتوفيق :*

    ردحذف

اعلانات