التخطيط اليومي \Daily planner

السلام عليكم ورحمه الله وبركاته

 

اولاً احب اشكر كل شخص ساعد على نشر تدوينتي السابقه  ..شكراً لكم

ثانياً تدوينه اليوم جداً غير عن باقي التدوينات ليه ..! لانها مثل ماهو واضح بالعنوان التخطيط اليومي

يعني مالها علاقه بالجمال والعنايه ..

بتفيدك هل تدوينه "بأذن الله "

اذا كنتي

*حابه تنظمين وقتك

* ودك تبدين بدايه جديده مع بدايه السنه \ وبدايه الفصل الجديد

* حابه تتطلعين على فكره التخطيط اليومي \Daily planner

 

ايش سالفه هل تدوينه

*ملاحظه البارت المهم تحت بعد الصوره هنا مجرد كلام ..

ارجع للموضوع انا واعوذ بالله من كلمة انا  فيني صفه سيئه اللي هي اني مش منظمه ..نعععم يمكن ثلاث ارباع اللي يقرا بيقول بنفسه طيب على اي اساس ان شاء الله منزله هل تدوينه تتفلسفين على راسنا .. بس بقول لكم ان عندي صفه زينه ولله الحمد اللي هي اني اسعى الى تغيير هذه الصفه ..ف من هل اساس نزلت هل تدوينه بعد ما انتهت من السمستر اللي راح اللي كان امممممم ماراح  اقول سيى راح اقول غير جيد من ناحيه المعدل والسبب اني كنت مشغوله جداً جداً جداً ..ولهل سبب مانزلت تدوينات  ولهل سبب نزل معدل ولهل سبب انا مش راضيه

هل السبب اني كنت مشغوله ..؟!

لا  لان كل الناس تنشغل السبب كان اني كنت غيرمنظمه

لو اني انظم شغلي عدل وكنت مرتبه اشغالي كان ما اضطريت اني انحاس بالترم اللي راح ويتلخبط كل شي

فقعدت ابحث بالنت عن التنظيم وغيره واشوف مقاطع يوتيوب عن طريقه تنظيم اليوم وكيف الاستفاده منه

وقعدت اشوف الافكار اللي تناسبني واشوف تجارب الناس  وفتحت الفتوشوب عشان اصمم لي ورقه تناسب احتياجاتي

بعدين فكره ليش ما اشاركم الورقه فقعدت اصمم وطلعت لكم بالاشياء اللي راح تشوفونها بهل تدوينه ..

 

 

 

 

 

لما بحثت عن التخطيط اليومي

لقيت اوراق اشكال وانواع كانت من كل ورقه تعجبني فكره لكن مالقيت ورقه يعجبني كل اللي فيها يعني من الاشياء اللي ما اعجبتني باللي شفتها ان من ضمن التخطيط خانه لتحديد وجبه الفطور والغداء والعشاء طبعاً ما اعجبني ابداً يعني مش لهل درجه التخطيط هاذي ممكن تفيد اللي مسوويه دايت مثلاً ولهم وجبات معينه اما غيره احس صعبه شوي ... فعشان كذا فتحت الفتوشوب وصممت لي ورقه فيها الاشياء اللي حابه تكون في يومي بعدين فكره اصمم لكم معي وعشان كذا طلعت ب 4 تصاميم ب اشكال مختلفه حاولت انوع شوي عشان واحد منهم يناسب لذوقك 2 من التصاميم عربي و2 انجليزي

 

 

 

هاذي التصاميم العربيه وراح اشرح لكم كل خانه بشكل مختصر

 شرب الماء ...

من الاشياء المهمه اللي الكل نعرفها بس اغلبنا ينسى يشرب المعدل المطلوب

عشان كذا حبيت ادخلها في يومي وان شاء الله استمر

 

قراه القران

ناويه باذن الله اني اقرا كل يوم صفحه واستمر على هل شي .. وممكن ازيد بس اهم شي ما يقل عن صفحه

لان فعلاً مقصره لما يروح اليوم على تويتر – انستقرام – طلعه وغيره وغيره و ولا افتح كتاب الله

اللي هو اهم من هل اشياء كلها فعلاً انا مقصره باشياء كثير ..ان شاء الله راح اغيرها  

 

المهام

اي مهام محتاجه تضيفينها بيومك راح اتكلم عن نفسي وايش ناويه اضيف

حابه اخصص كل يوم شي اسويه لنفسي عنايه سواء(بشره ,شعر ,جسم ,اظافر ...الخ )

الشي الثاني حابه اقرا الكتب اللي عندي ..راح اخلي هل شي من مهامي

الشي الثالث مهام الجامعه من محاضرات ماكتبتها وغيره عشان ما تتراكم علي

امممم ايش بعد بس هاذا اللي يحضرني حالياً

 

 

 

highlight of the dayالحمد لله -

 

ليش اخترت اضيف

highlight of the day

 وليش ترجمتها بالحمد لله

 

بختصار شديد انا اتابع يوتيوبر تصور حياتها يومياً وتنزلها باليوتيوب بختصار هي الوحيده اللي تابعتها

الشي اللي اعجبني فيها انها كانت كل نهايه يوم تقول راح اشارككم

 "my highlight today"

كلمه هايلايت تعني امم شفتي لما تذاكرين ماده

فتأشرين على الافكار الرئيسيه او الاشياء المهمه بالاقلام الفسفوريه عشان تنتبهين لها هاذا معنا هايلايت

ومعنى جملتها هاذي انها تشارك شي مميز اعجبها مرات تكون هل اشياء بسيطه

ومرات تكون كبيره العبره انها تتذكر شي زين بنهايه اليوم  

في عباره كتبتها على وحده من الاوراق اللي صممتها تقول

"Every day may not be good, but there's something good in every  day"

الترجمه

ان مش كل يوم جيد لكن في شي جيد في كل يوم

وشفت فلم قبل اسبوعين اثر فيني قصه الفلم بختصار شديد ان شخص

عنده القدره على انه يعيد الايام اللي راحت لمين تجي نهايه الفلم  بعد احداث طويله ويقرر الشخص

انه يوقف يرجع للايام ويبدا يعيش كل يوم بيومه ويستمتع بكل يوم وكانه اخر يوم

العبره

ان هل سببين خلتني اضيف فكره الهايلايت

وخلتني اترجمها بالحمد لله

بتكلم عن نفسي ..مثل ما انا محتاجه اعيد يومي بنهايه اليوم واشوف بيني وبين نفسي هل سويت شي غلط هل هل هل

 محتاجه بعد اعيد اليوم واشوف نعم الله اللي وهبني اياها بهاذا اليوم واشكره  

 و ولا ننسى الايه

(وَإِنْ تَعُدُّوا نِعْمَةَ اللَّهِ لاَ تُحْصُوهَا)

مهما كان يومك سيى اكيد فيه نعمه اكيد فيه شي جميل

 بس محتاج منك تتأمليه وتشكرين ربك عليه

 

 

واخيراً

بعد ماصممه هل الاوراق وطبعتهم وديتهم اليوم للمكتبه عشان اغلفهم تغليف حراري

وشريت قلم صبوره عشان اكتب وامسح بدال ما اطبع كل يوم ورقه ..

يعني مثل الصبوره ..اهم شي تاكدو ان القلم ينمسح ..

 

 

طيب يمكن بعد كل هاذا تجي وحده ومايعجبها فكره التخطيط اليومي بس اعجبتها فكره التنظيم

او وحده مثلي تحمست بدال ما تنظم يومها تبي تنظم زياده

 

 

 

هنا بالصوره طبعت اهداف للاسبوع عشان لما اخطط لليوم احط ببالي ان لازم يوم من هل اسبوع اسوي واحد من هل اشياء

عشان اذا انتهى الاسبوع الا اني مخلصتهم كلهم

وفي فكره ثانيه اعجبتني اللي موجوده بالصوره لبرواز من ايكيا يصلح تخلينه ابيض ساده

او مثلي تطبعين باترن وتكتبين فوقه مهام انا قررت راح اخليه على الطاوله واكتب فيه الحبوب اللي لازم اخذها لاني دايم انسى اذا كليت الحبه او لا

 

 

اخر شي

هاذي الصور اللي اقتبست منها ممكن تفيدك

 

 

 

 

 

وهنا صور التصاميم اللي صممتهم

ماعليك الا تضغطين على الصوره عشان تتكبر وتقدرين تحفظينها وتطبعينها

 

 

 

 

 

وبكذا خلصت التدوينه اتمنى تستفيدون منها

اذا طبقتي وحده من هل افكار ياليت ترسلين لي على تويتر او تسوين لي تاق بالانستقرام
راح يسعدني هل شي

حسابي

Glamour_90s

لا الله الا انت سبحانك اني كنت من الظالمين